Қазақстандағы көші-қон: келушілер саны кеткендерден үш есеге асып түсті

Соңғы бір жылда Қазақстанға көшіп келгендердің саны елден кеткендерден үш есеге артық болды. Ұлттық статистика бюросының дерегінше, елге 23 761 адам қоныс аударса, 7 608 адам шетелге көшкен, деп хабарлайды Todayinfo ақпарат агенттігі. Көші-қон белсенділігінің жалпы төмендеуіне қарамастан, елден кететіндер легінің 40,5%-ға күрт азаюы осындай оң айырманы қамтамасыз етті. Халық алмасуының негізгі бөлігі (шамамен 80%) бұрынғысынша ТМД елдерінің үлесінде қалып отыр. Елішілік көші-қон көрсеткіші де 13,6%-ға өскен. Халық негізінен ірі мегаполистерге қарай ағылуда. Бұл үрдіс бойынша Астана (+87,5 мың адам), Алматы облысы (+33,1 мың), Шымкент (+15,1 мың) және Алматы қаласы (+12,1 мың) көш бастап тұр. Этникалық құрамға келсек, елге оралғандар арасында қазақтардың үлесі 67,7%-ға дейін өскен (бір жыл бұрын бұл көрсеткіш 56,6% болған). Ал елден кеткендердің басым бөлігі – қазақтар (48,6%), одан кейінгі орындарда орыстар (17,7%) мен немістер (13,1%) тұр. Фото: Әлеуметтік желіден