Қазақстандық банк арқылы 7 трлн теңге шығарылды: үш орган тексеріс бастады

Қазақстандық банктердің бірі арқылы көрші елден үшінші мемлекеттерге 7 трлн теңгеден астам қаржы аударылғаны анықталды. ҚНРДА, Ұлттық банк және ҚМА ірі тексеруді бастады.

Қазақстандағы банктердің бірі арқылы 7 триллион теңгеден астам қаражат шетелге шығарылған болуы мүмкін. Осыған байланысты Қаржы нарығын реттеу және дамыту агенттігі (ҚНРДА), Ұлттық банк және Қаржылық мониторинг агенттігі (ҚМА) бірлесіп, ауқымды тексеріс бастады, деп хабарлайды Todayinfo ақпарат агенттігі. Қаржы нарығын реттеу және дамыту агенттігі бұл ақпаратты ресми растап, бірнеше банктің трансшекаралық операциялары тексеріліп жатқанын мәлімдеді.

"Аталған мәселелерді қарастыру үшін ҚНРДА, Ұлттық Банк және Қаржылық мониторинг агенттігінің қатысуымен белгіленген тәртіппен бірқатар банктің трансшекаралық операцияларына тексеру басталды", — деп хабарлады ведомство.

Белгілі болғандай, 7 триллион теңгеден астам қаржы көршілес елден келіп, қазақстандық банк арқылы үшінші мемлекеттерге аударылған. Бұл қаржылық операциялардың заңдылығына күмән келтіріліп отыр. Жуырда бұл мәселеге Президент Қасым-Жомарт Тоқаевтың өзі назар аударған болатын. Мемлекет басшысы Қаржылық мониторинг агенттігінде өткен кеңесте банктердің күмәнді және заңсыз операцияларын қатаң бақылауға алуды тапсырған еді. Фото: Әлеуметтік желіден