Қазақстан Сауд Арабиясына алғаш рет халал сертификаты бар қой етін экспорттай бастады. Бұл корольдіктің «ҚазСтандарт» ұлттық органының халал сертификатын ресми тануы арқылы мүмкін болды, деп хабарлайды Todayinfo ақпарат агенттігі.
Бұған дейін Сауд Арабиясының Азық-түлік және дәрі-дәрмек басқармасына (Saudi Food and Drug Authority) қарасты Saudi Halal Center орталығында Қазақстаннан ешбір орган аккредиттелмеген еді. Енді «ҚазСтандарт» берген құжат өнімнің шариғат талаптарына және халықаралық стандарттарға толық сәйкес келетінін растайды. Осындай мойындаусыз экспорт жасау мүмкін емес болатын.
Қазақстандық өнімді сыртқы нарыққа шығаруға Агроөндірушілер және экспорттаушылар қауымдастығы атсалысып жатыр. Қауымдастықтың Біріккен Араб Әмірліктеріндегі, Сауд Арабиясындағы және Өзбекстандағы сауда өкілдіктері отандық етті ілгерілетумен айналысады.
Сарапшылардың пікірінше, талабы өте жоғары Сауд Арабиясы нарығына ену – Парсы шығанағындағы басқа елдерге де жол ашады. Бұл өз кезегінде экспорт географиясын кеңейтіп, Қазақстанның халықаралық агроөнеркәсіп нарығындағы орнын нығайта түспек.
Фото: Әлеуметтік желіден
