Ақмола облысының Қосшы қаласындағы мәдени-спорттық кешенде 10 жастағы оқушы қыз сабақ үстінде көз жұмды, деп хабарлайды Todayinfo ақпарат агенттігі.
Оқиға қоғамдық кешендегі сабақтардың бірінде болған. Белгілі болғандай, марқұм қыз бұрыннан "бронх демікпесі" диагнозымен диспансерлік есепте тұрған.
Сабақ кезінде оның жағдайы кенеттен нашарлап, жедел жәрдем шақырылған. Алайда, дәрігерлер келгенше қыздың халі мүлдем нашарлап кеткендіктен, барлық қажетті жабдықтары бар реанимобильді жіберу үшін екінші рет қоңырау соғуға тура келген.
Өкінішке қарай, дәрігерлердің бар күш-жігеріне қарамастан, баланы аман алып қалу мүмкін болмады.
Ақмола облысының полиция департаменті бұл жағдайға қатысты түсініктеме берді.
"Кәмелетке толмаған баланың өлімі дерегі Қосшы қаласының полиция бөлімінде тіркелді. Қазіргі уақытта оқиғаның барлық мән-жайын анықтауға бағытталған тергеу амалдары жүргізіліп жатыр. Тексеру нәтижелері бойынша түпкілікті процестік шешім қабылданады", – деп хабарлады ведомстводан.
Фото: Әлеуметтік желіден
