Қырғызстандағы билік басындағы кадрлық ауыс-түйіс жалғасып жатыр. ҰҚМК басшысы Қамчыбек Ташиевтің отставкасынан кейін оның жақын адамдары да қызметінен кете бастады, деп хабарлайды Todayinfo ақпарат агенттігі.
Жақында Ұлттық қауіпсіздік мемлекеттік комитетінің (ҰҚМК) бұрынғы басшысы Қамчыбек Ташиевтің жиені Нұрғазы Матисақов та көлік прокуратурасының бастығы қызметінен босатылды. Ол бұған дейін Шу облысының бірнеше ауданында прокурор болып жұмыс істеген.
Нұрғазының ағасы Байғазы Матисақов бірнеше компания мен Жалал-Абад мұнай өңдеу зауытын 2021 жылдан бері басқаратыны белгілі.
Осыған дейін Қырғызстан президенті Садыр Жапаров 2020 жылдың қазан айынан бері арнайы қызметті басқарған Ташиевтің өкілеттігін мерзімінен бұрын тоқтату туралы жарлыққа қол қойған еді. Президент бұл шешімін былай түсіндірді:
"Мен бұл шешімді қоғам мен мемлекеттік құрылымдар арасында жікке бөлінуге жол бермеу үшін қабылдадым", - деді Жапаров.
Ташиевтің отставкасынан кейін Жогорку Кеңеш спикері Нұрланбек Тұрғынбек ұлы да қызметінен кетті. Ол мұндай қадамға саяси тұрақтылық үшін барғанын мәлімдеді.
Фото: Әлеуметтік желіден
