“Түрі де, білімі де жетпейді”: Сәуле Әбілдаханқызы жаңа жылдық эфирге шүйлікті

Журналист Сәуле Әбілдаханқызы 31 желтоқсан күні теледидардан көрсетілген жаңа жылдық концертке қатысты қатты сыни пікір білдірді. Ол эфирде жүргізушілер мен жалпы бағдарламаның сапасына қатысты көзқарасын ашық айтып, әлеуметтік желіде бөлісті. Оның сөзінше, концерт барысында кәсіби деңгейдің төмендігі байқалған. Бұл әсіресе жүргізушілердің сөйлеу мәнері мен экран алдындағы жүріс-тұрысынан анық көрініп тұрғанын айтты. Бұл туралы Todayinfo.kz ақпарат агенттігі хабарлайды. Сәуле ханым эфир жүргізіп тұрған блогер қыздың тіл білгені болмаса, елдің алдына шығатындай түрі де, білімі де жетпейді деп сынады. Оның сөзінше, мәтінді суфлёрдан оқып жатқан жүргізушілер көздерін тым жиі ойнақтатып, өздеріне сенімсіз көрінеді. Енді бірі күзет камерасына түскендей қозғалып, «переигрывание» мен «перебор» көп болды дейді. Журналист бағдарлама жүргізушілерінің киіну мәнері мен мәтін сапасын да сынға алды. Оның айтуынша, нашар ойластырылған сценарий мен артық боялған сән үлгісі бүкіл кештің көркемдігін жойған. Сондай-ақ жаңа жылдық эфир үшін бюджеттен миллиондап қаржы жұмсалуы мүмкін екенін еске салып, бұл қаншалықты орынды деген сауал тастады.

Президент құттықтауы мен соңғы жылдардағы өзгеріс қандай әсер қалдырды?

Сәуле Әбілдаханқызының айтуынша, эфир соңында Президенттің екі тілде жасаған құттықтауы бұрынғымен салыстырғанда анағұрлым шынайы көрінді. Ол алдыңғы жылдармен салыстырғанда, биылғы құттықтаудан жақсылықтың белгісін байқағанын да жасырмады. Мәселен, Президент қолында шампан бокалын ұстап шығудан бас тартып, ресми шыршасыз фон таңдағаны – оң өзгеріс деп бағалады. Сонымен бірге барлық отбасының бірдей Қазақ елінің Әнұранын бірге шырқағанын ерекше атап өтті. Бұл сәтте ол халықтың бірлігі мен ұлттық рухтың нығая түскенін сезінгенін айтты.

Бұл пікір кімдерге ой салуы мүмкін?

Бұл сын эфир сапасына жауапты телеарна қызметкерлеріне де, мәдениет саласын қаржыландыратын мекемелерге де қатысты. Мемлекеттік қаржыны тиімді пайдалану, ұлттық мереке кезіндегі контент мәдениеті секілді мәселелер қайта қарастырылуы мүмкін.