Солтүстік Қазақстан облысында жасөспірім мектепке шабуыл жасаймын деп құрдастарын қорқытып, ақша бопсаламақ болды, деп хабарлайды Todayinfo ақпарат агенттігі.
Ол облыстық мамандандырылған мектеп-интернат оқушыларына шабуыл дайындалып жатқаны туралы жалған хабарламалар таратқан. Артынша сол шабуылды ақшаға «тоқтатуды» ұсынған.
Полиция қызметкерлері хабарлама авторын көп ұзамай анықтап, ұстады. Тергеу кезінде бозбала мұны жай ғана «қалжың» деп атап, ісінің соңы неге әкелетінін ойламағанын мойындады.
Қазір жиналған материалдар кәмелетке толмағандардың істері жөніндегі комиссияға жіберуге дайындалуда. Сонымен қатар жасөспірімді мінез-құлқында ауытқуы бар балаларға арналған арнайы мекемеге жіберу мәселесі де қарастырылып жатыр. Түпкілікті шешім тексеруден кейін қабылданады.
Фото: Әлеуметтік желіден
