Студенттер жол-құрылыс материалдарымен танысты

«Жол активтері сапасының ұлттық орталығы» РМК Алматы облыстық филиалында ашық есік күні ұйымдастырылып, оған Сәтбаев университетінің студенттері қатысты. Бұл туралы Todayinfo.kz ақпараттық порталы хабарлайды. Іс-шара барысында жастар жол-құрылыс саласына арналған зертханалық жұмыстармен танысып, заманауи құрал-жабдықтардың мүмкіндіктерін көрді. Кездесуді материалдар инженері Бекежан Жәнібек жүргізіп, қатысушыларға инертті материалдар мен битум қоспаларына жасалатын сынақтар туралы кеңінен түсіндірді. Студенттер бірнеше зертхана кабинеттерін аралап, жолдан алынған керн үлгілерін зерттеу процесіне куә болды. Сонымен қатар елімізде сирек қолданылатын жол жабындысының калибрленуін анықтайтын «колееобразование» қондырғысының жұмыс принципі таныстырылды. Айта кетейік, орталықтың зертханасы қазіргі талапқа сай техникалармен жабдықталған. Ұйымдастырушылардың айтуынша, алдағы уақытта да осындай іс-шаралар өткізіліп, білім беру мекемелері мен өндіріс орындары арасындағы байланыс нығая бермек.