Мьянмада еңбек құлдығында болған Қазақстан, Қырғызстан және Өзбекстан азаматтары арнайы дипломатиялық іс-шаралардың нәтижесінде елдеріне қайтарылды. Отандастарымыз Таиландқа "жоғары жалақы төленетін жұмыс" іздеп барып, адам саудасымен айналысатындардың құрбаны болған.
Бұл оқиға шетелге табыс іздеп шыққан кез келген азамат үшін сабақ болуы тиіс.
Тегін автобус және шекарадағы алдау
Халықаралық БАҚ-тың хабарлауынша, зардап шеккендердің басым бөлігі ғаламтордағы "Таиландтағы тиімді жұмыс" туралы жарнамаға сенген. Жұмыс берушілер оларды діттеген жерге тегін жеткізуге уәде беріп, арнайы автобустарға отырғызған.
Алайда, көлік Таиландтың курорттық аймақтарына емес, Мьянма шекарасына бет алған. Сол жерде азаматтарды алдап шекарадан өткізіп, адам саудасымен айналысатын қылмыстық топтардың қолына табыстаған.
«Бас тартқандарды ұрып-соққан»: Тұтқындағы өмір
Kun.uz басылымының жазуынша, құлдыққа түскендерді Мьянма аумағындағы алаяқтық (scam) call-орталықтарында жұмыс істеуге мәжбүрлеген.
"Құрбандардың айтуынша, оларды интернет алаяқтықпен айналысуға күштеген. Ал заңсыз әрекетке қатысудан бас тартқандарға физикалық күш қолданылып, үнемі қоқан-лоққы жасалған", – делінген дереккөзде.
Бұл "Алтын үшбұрыш" деп аталатын аймақта жиі кездесетін қылмыстық схема екені белгілі. Адамдарды заңсыз ғимараттарда қамап, төлқұжаттарын тартып алып, тәулік бойы жұмыс істеткен.
Қазақстандықтар қалай құтқарылды?
Тұтқындағылардың бір тобы амалын тауып, Бангкоктағы Өзбекстан бас консулдығына хабарласып үлгерген. Дипломаттар мәселені тексере келе, тұтқында тек өзбекстандықтар емес, Қазақстан және Қырғызстан азаматтары да бар екенін анықтаған.
Үш елдің дипломатиялық ведомстволары Таиланд және Мьянма билігімен бірлесе отырып, жедел әрекет етті. Нәтижесінде, құлдықта болған барлық азаматтар босатылып, қазіргі таңда өз отандарына аман-есен оралды.
Әзірге Қазақстанның ресми органдары бұл нақты кейс бойынша жеке мәлімдеме жасамағанымен, шетелдегі азаматтардың қауіпсіздігі ұдайы бақылауда екені белгілі.
