Президент Қасым-Жомарт Тоқаев Вашингтонда Америка Құрама Штаттарында білім алып, жұмыс істеп жатқан қазақстандықтармен кездесу өткізді, деп хабарлайды Todayinfo ақпарат агенттігі.
Кездесу еркін форматта өтіп, оған АҚШ-тың беделді университеттерінде оқитын студенттер мен түрлі салада еңбек ететін жас мамандар қатысты. Мемлекет басшысы өскелең ұрпаққа үлкен сенім артатынын атап өтті.
"Сіздер – еліміздің болашағысыздар. Мемлекет жастарға әрқашан қолдау көрсетіп, олардың жан-жақты дамуына және қабілетін ұштауға барлық жағдайды жасайды. Шетелде алған білімдеріңіз бен тәжірибелеріңіз Қазақстанның игілігіне қызмет ететініне сенімдімін", – деді Президент.
Сонымен қатар Қасым-Жомарт Тоқаев елімізде жүргізіліп жатқан конституциялық реформалардың тарихи маңызына тоқталып, оның мемлекеттілікті нығайтудағы рөлін атап өтті.
Кездесуге қатысушылар өз кезегінде ғылым мен білім саласына көрсетіліп жатқан қолдау үшін Мемлекет басшысына алғыс білдіріп, өздерінің ұсыныстарымен бөлісті.
Фото: Әлеуметтік желіден
