Трамп пен Нетаниягу Флоридада не жайлы сөйлесті: Иран, Газа және Ердоғанның рөлі

АҚШ президенті Дональд Трамп пен Израиль премьер-министрі Биньямин Нетаниягу Флоридада жүздесіп, Таяу Шығыстағы ахуалды талқылады. Кездесу барысында Иран, Газа секторы мен Түркияның ықтимал әрекеттері басты назарда болды. Бұл туралы Todayinfo.kz ақпарат агенттігі хабарлайды. Трамп Иранның әскери әлеуеті қайта күшеюі мүмкін екенін айтып, егер бұл расталса, АҚШ қатаң жауап беруге дайын екенін мәлімдеді. Ол: "Біз оларға толық күшімізді қолдануға мәжбүр боламыз, бірақ бұған жеткізгіміз келмейді" — деді. Иранмен келіссөз жүргізу жайында Трамп Тегеранның диалогқа мүдделі екенін естігенін тілге тиек етіп: "Иран үшін бұл әлдеқайда ақылды әрі тиімді жол болар еді" — деді.

Иранға соққы жасау жайлы: Трамп пен Нетаниягу пікірі қандай?

Израильдің Ирандағы нысандарға соққы жасауына қатысты Трамп баллистикалық зымырандарға бағытталған операцияларды орынды деп есептейтінін мәлімдеді. Ал егер ядролық қауіп туындаса, Израиль мен АҚШ әрекет етуі тиіс екенін айтты. Трамптың пікірінше, аймақтағы қауіптерге тез жауап беру маңызды, әсіресе ядролық қауіп туындағанда жағдай бірден ушығуы мүмкін.

Түркияның Газа секторындағы ықтимал рөлі қандай болады?

Трамп Түркия президенті Режеп Тайып Ердоғанмен жақсы қарым-қатынаста екенін айтып, Газаға түрік әскерін енгізу жайын онымен жеке талқылайтынын жеткізді. Егер бұл шешім тиімді болып шықса, ол оны қолдайтынын білдірді. Сондай-ақ Трамп Ердоғанды жоғары бағалап: "Ол тамаша және өте жақсы көшбасшы" — деп сипаттады. Газадағы жағдайды Трамп "бейберекет" деп атап, қақтығыстың бірнеше ғасырға созылған күрделі тарихы бар екенін айтты. Алайда ол Газа секторын қалпына келтіру жұмыстары жуық арада басталатынына сенім білдірді. Кездесу аясында Нетаниягу АҚШ-тың мемлекеттік хатшысы Рубиомен және қорғаныс министрі Хегсетпен де кездесу өткізді.