Ұлытау облысында асқан қатыгездікпен кісі өлтірген ағайынды екі жігіт сотталды

Ұлытау облысында асқан қатыгездікпен кісі өлтірді деп айыпталған ағайынды екі жігіт сотталды.   Фото: pixabay.com Ұлытау облысының қылмыстық істер жөніндегі мамандандырылған ауданаралық сотында күдіктілер А мен У-ға қатысты адам өліміне қатысты қылмыстық іс қаралды. Соттың мәліметінше, күдіктілер алкогольдік мас күйде болған азамат К-ны өлтіргені үшін кінәлі деп танылды. "2024 жылдың 19 наурызында, кешкі 21:00 шамасында, сотталушылар А мен У өз үйлерінде ішімдік ішіп отырған. Сөзге келу барысында ағайындылар К-ны өлтіруге шешім қабылдаған. Сотталушы А К-ны жіппен тұншықтырып, ал У марқұмның аяқтарын ұстап тұрған. Нәтижесінде К көз жұмды", – делінген сот хабарламасында. Қылмыстың ізін жасыру үшін айыпталушылардың мәйітті автокөлік дөңгелектерімен бірге өртеп жібергені анықталды. Айыпталушылардың кінәсі куәлардың көрсетулерімен, сараптама қорытындыларымен, басқа да заттай айғақтармен дәлелденді. Соттың мәліметінше, айыпталушы У Жезқазған қаласының уақытша ұстау изоляторында өз-өзіне қол салу нәтижесінде көз жұмған. "Сот А мен У-ды қылмыс үшін кінәлі деп таныды. Сотталушы А 15 жылға бас бостандығынан айырылды, ал сотталушы У қаза тапқандықтан, қылмыстық жауапкершіліктен босатылды", – делінген хабарламада. Сот үкімі заңды күшіне енген жоқ. Еске салсақ, бұған дейін Петропавлда алқабилер соты үш кісіні өлтірді деп айыпталған ер адамды ақтап алғаны туралы жазған едік.