«Жеңіс саябағын қорлап жатырмыз»: Павлодар жастары Мәңгілік алау жанында тверк билеген

Павлодар қаласында Жеңіс алаңында орналасқан Мәңгілік алау жанында бірнеше жасөспірім қыздың ұятсыз би билеген видеосы әлеуметтік желілерде кең таралып, көпшіліктің ашуын тудырды, деп хабарлайды Todayinfo. Қыздардың бірі видеоның астына «Жеңіс саябағын қорлап жатырмыз» деген жазба қалдырған. Павлодар облыстық полиция департаментінің хабарлауынша, роликке қатысы бар барлық жасөспірім анықталып, ата-аналарымен бірге полиция бөліміне жеткізілген.

«Кәмелетке толмағандардың жасаған құқықбұзушылығы үшін әкімшілік жауапкершілікке тартылды. Сонымен қатар, олардың заңды өкілдеріне де балаларды тәрбиелеу міндетін дұрыс атқармағаны үшін әкімшілік шара қолданылды. Қазіргі таңда бұл оқиғаға қатысты материалдар сотқа жолданды», – делінген ресми хабарламада.

Бұдан бөлек, бұл іс Павлодар қаласы әкімдігі жанындағы кәмелетке толмағандардың істері және олардың құқықтарын қорғау жөніндегі комиссия қарауына жіберілді.