Қазақстанда құмар ойындар нарығындағы ірі қылмыстық топтың жолы кесілді. Қаржылық мониторинг агенттігі (ҚМА) айналымы 600 миллиард теңгеден асатын орасан зор "көлеңкелі" желіні анықтады. Бұл іске тек жергілікті азаматтар емес, Испания, Вьетнам және көршілес елдердің өкілдері де қатысқан.
Бұл схеманың ауқымы мен айла-тәсілдері тіпті тәжірибелі тергеушілердің өзін таңғалдырды. Заңсыз ақша ағыны қарапайым төлемдер сияқты жасырылып, шетелге шығарылып отырған.
Алаяқтық схемасы қалай жұмыс істеді?
Қылмыстық топ онлайн-казинодан түскен табысты заңдастыру үшін күрделі қаржылық айлаларды қолданған. Олар финтех-сервистер арқылы букмекерлік кеңселермен жалған келісімшарттар жасап, "сұр" POS-терминалдарды іске қосқан.
Нәтижесінде, ойыншылардың аударған ақшасы заңды төлем ретінде көрініп, іс жүзінде онлайн-казиноның қалтасына түсіп отырған.
Тергеу мәліметі бойынша, бұл іске:
-
20-дан астам төлем ұйымы;
-
Екінші деңгейлі банктердің лауазымды тұлғалары қатысқан.
Банк қызметкерлерінің араласуы қылмыстық топқа кедергісіз әрекет етуге мүмкіндік берген.
Халықаралық Call-орталық және крипто-активтер
Бұл жай ғана жергілікті қылмыс емес, трансұлттық сипатқа ие ұйымдасқан топ. ҚМА қызметкерлері заңсыз казиноларға қызмет көрсеткен арнайы Call-орталықты жапты.
Орталықтың ауқымы үлкен: оның жұмысына Қазақстан, Ресей, Беларусь, Испания және Вьетнам азаматтарынан құралған 120 адам жұмылдырылған. Олар төрт бірдей ірі онлайн-казиноға техникалық қолдау көрсетіп, ақша аударымдарын реттеп отырған.
Сонымен қатар, ұйымдастырушылар криптовалюта арқылы да қаржы жымқырған. Олардың crypto-әмияндары арқылы өткен айналым 200 млн USDT-тен (шамамен 200 млн доллар) асып жығылады.
Тұтқындау және іздеу
Операция барысында 70-тен астам тінту жұмыстары жүргізіліп, бұлтартпас айғақтар тәркіленді. Нәтижесінде 9 адам қамауға алынды. Олардың арасында ықпалды тұлға – «Төлем ұйымдары қауымдастығы» басшысының кеңесшісі де бар.
Қазіргі уақытта тағы 8 адамға халықаралық іздеу жариялауға дайындық жүріп жатыр, олардың арасында шетелдіктер де бар.
Ескерту: Қазақстанда онлайн-казино қызметіне қатаң тыйым салынған. Мұндай платформаларға көмектесу немесе жарнамалау қылмыстық жауапкершілікке әкеп соғады.
