17 тамыз күні Ақмола облысында Aerostar R40F UP-LA229 маркалы жеңіл моторлы ұшақ апатқа ұшырады. Оқиға салдарынан пилот пен жолаушы көз жұмды. Бұл туралы ҚР Көлік министрлігі хабарлады.
Оқиғаның жай-жапсары
Ұшақ жалпы мақсаттағы авиация аясында әуеге көтерілген. Құлаған сәтте өрт шықпаған. Қазір апат себебін анықтау үшін арнайы комиссия құрылып, Көлік министрлігінің апаттарды тергеу департаменті оқиға орнына аттанды.
Тергеу басталды
Полиция департаментінің ақпаратына сәйкес, ҚР Қылмыстық кодексінің 344-бабы 3-бөлігі бойынша сотқа дейінгі тергеу басталған. Бұл бап көлік құралдарын пайдалану ережелерін бұзу салдарынан екі немесе одан да көп адамның қаза табуын көздейді.
Құқық қорғау органдарының мәліметінше:
«Пилот пен жолаушы қаза тапты. Құлау себебі анықталуда», – делінген хабарламада.
Тергеу үшін ІІМ, көлік полициясы және Ақмола облыстық полиция департаменті қызметкерлерінен құралған арнайы тергеу-жедел тобы жұмыс істеуде. Қылмыстық істі Ішкі істер министрлігі ерекше бақылауға алды.
Ұшақ туралы мәлімет
Aerostar R40F – румын өндірісіндегі екі орындық оқу-жаттығу және спорттық ұшақ. Ол жеңіл әуе техникасына жатады:
-
төменгі қанатты, алюминий корпусты, үш доңғалақты қону шассиімен жабдықталған;
-
шамамен 100 ат күші бар Rotax қозғалтқышымен ұшады;
-
негізінен оқу-жаттығу мен әуесқойлық саяхаттарға қолданылады.
