Чилиде таңғалып отыр: жергілікті жұлдыз Томас Джонс Қызылорданың «Қайсарына» ауысты

Чилилық футбол шолушылары Томас Джонстың Қазақстанға келуін күтпеген қадам деп бағалады. Оң қапталда ойнайтын 28 жастағы вингер енді Қызылорданың «Қайсарында» өнер көрсетеді. Бұл туралы Todayinfo порталы хабарлайды. AS.com-ның чилилік редакциясындағы шолушы Бастиан Арриаса бұл ауысымды «Чили үшін ерекше жағдай» деп атады. Оның айтуынша, соңғы жылдары жергілікті ойыншылардың Қазақстан бағытын таңдауы өте сирек кездеседі. «Қайсардың» баспасөз қызметі Джонспен келісімшарт жасалғанын ресми түрде жариялады. Ең қызығы — бұл «қасқырлар» тарихындағы Чилиден келген алғашқы футболшы. Ал Томас Джонс үшін бұл келісім мансабындағы тұңғыш шетелдік тәжірибе болмақ. Бұған дейін ол тек Чили клубтарында ойнап, «Барнечеа», «Магалланес», «Санта Крус» және «Копиапо» сапында доп тепкен.

Чили басылымы неге «уникалды» деді?

Шолушының жазуынша, Джонс «Копиапо» құрамында бір маусымды жарқын өткізгенімен, командасы күткен деңгейге көтеріле алмаған. Соған қарамастан футболшы мансабын басқа арнаға бұрып, Қазақстан чемпионатына бет алды. Чили медиасында бұл бағытты «экзотикалық» деп сипаттаған. Дегенмен дәл осы қадам оған алғаш рет елден тыс жерде ойнауға мүмкіндік береді.

Статистикасы әсерлі, бірақ бағыты өзгерді

Материалда 2025 жылы Джонс 34 матч өткізіп, 14 гол соғып, 3 нәтижелі пас бергені айтылады. Осы көрсеткіштерден кейін оның аты түрлі трансферлік тізімдерде жиі атала бастаған. Соңғы апталарда ойыншы «Кобрелоаға» ауысуы мүмкін деген қауесет те күшейген. Алайда ақыры Томас мансабын Қызылордада жалғастыруды таңдады. Енді жанкүйерлер «Қайсардың» Чилиден келген алғашқы легионері Қазақстан Премьер-Лигасына қаншалықты тез бейімделетінін және команданың шабуылына қандай серпін беретінін күтіп отыр. Қайсар, Томас Джонс, Қазақстан футболы, Чили футболы, трансфер