Чип пен электронды қондырғылар Еуропаға экспортталады - Берік Уәли облыста жаңа зауыттың салынатынын хабарлады

Семей қаласында елімізде алғаш рет чиптер мен электронды құрылғылар шығаратын жоғары технологиялы индустриялық парктің құрылысы басталды. Жаңа өндіріс орнының іргетасын қалау рәсіміне Абай облысының әкімі Берік Уәли қатысты, деп хабарлайды Todayinfo ақпараттық агенттігі. Әкімнің айтуынша, зауыт заманауи электроқұралдар мен жарықтандыру жүйелеріне арналған диод чиптерін шығаратын болады. Мұндай өндіріс Қазақстанда алғаш рет іске асырылып отыр.

«Құрылыс кезеңінде 140 адам жұмыспен қамтылады. Ал зауыт толық іске қосылғаннан кейін 500-ден астам тұрақты жұмыс орны ашылады. Құрылысқа және болашақ қызметке Семей қаласының тұрғындары тартылады», - деді облыс әкімі.

Зауыт жұмысын бастағаннан кейін қызметкерлердің орташа жалақысы 250 мың мен 500 мың теңге аралығында болады деп жоспарланып отыр. Бұл – өңір халқының әлеуметтік жағдайын жақсартып, жергілікті экономиканың дамуына серпін беретін маңызды жоба.

Студенттерге тәжірибе, түлектерге тұрақты жұмыс

Жаңа зауыт Семейдегі IT және жаңа технологиялар жоғары колледжінің студенттері үшін өндірістік тәжірибе алаңына айналмақ. Кәсіпорын өкілдері оқу орнымен ынтымақтастық туралы меморандумға қол қойып, білікті мамандарды дайындауға және жұмысқа қабылдауға дайын екенін білдірді.

Инвестор – Қазақстан-Қытай компаниясы

Жобаны қазақстандық-қытайлық «SUTO KAZAKHSTAN» ЖШС жүзеге асырады. Құрылысы «Өндіріс» индустриялық аймағында жүргізілуде. Жалпы құны 50 миллион АҚШ долларын құрайтын жоба 2025–2028 жылдар аралығында үш кезеңмен жүзеге асырылмақ. Зауыттың өнімдері ішкі нарықпен қатар, ТМД елдері мен Еуропаға экспортталатын болады.

Қытаймен келісілген инвестициялық әріптестік

Айта кетейік, Абай облысының делегациясы жуырда Қытай Халық Республикасының Шыңжаң Ұйғыр автономиялық ауданына қарасты Алтай қаласында өткен халықаралық «Үлкен Алтай» субөңірлік конференциясына қатысып қайтқан болатын. Сол сапар аясында қазақстандық тарап пен қытайлық инвесторлар арасында 1,5 млрд АҚШ долларын құрайтын 15 меморандумға қол қойылды. Семейдегі чип өндіретін зауыттың құрылысы - аталған келісімдердің алғашқы нақты нәтижесі ретінде бағаланып отыр.