Фото: Жеке парақшасынан
Қазақстанның халық әртісі Мақпал Жүнісова әлеуметтік желіде алаңдатарлық жазба жариялап, өзін белгісіз адамдардың қорқытып жүргенін айтты, деп хабарлайды Todayinfo.kz ақпарат агенттігі.
Өнер иесінің сөзінше, бейтаныс адамдар Астанада тұратын әпкесіне хабарласып, оған қатысты түрлі әңгіме айтқан.
«Бұл қай қазақ мені қорқытып жүрген? Астанадағы әпкеме хабарласыпты. Мен ешқашан қарыз болмаған адаммын», – деп жазды әнші желідегі парақшасында.
Мақпал Жүнісова мұндай әрекетті түсінбейтінін айтып, өз атын пайдаланып, жалған ақпарат таратып жүргендер болуы мүмкін екенін меңзеді. Сондай-ақ ол халық алдында жүрген адам ретінде мұндай қысымның ауыр тиетінін жасырмады.
Желі қолданушылары әншінің жазбасына алаңдаушылық білдіріп, оған қолдау сөздерін жаудырды. Көпшілік мұндай жағдайдың анық-қанығын құқық қорғау органдары тексеруі керек екенін айтып, әншіге сабыр тіледі.
Айта кетейік, Мақпал Жүнісова бұған дейін де жеке өміріне қатысты ашық пікір білдіріп жүрген өнер иелерінің бірі. Бұл жолғы мәлімдемесі қоғам арасында түрлі болжам мен талқыға себеп болды.
Қазіргі таңда әнші бұл жағдайдың мән-жайын нақтылап, қайдан және кімдерден мұндай хабар келгенін анықтауға тырысып жатқанын жеткізді.
