Көркіне көз тоймас сұлу: 23 жастағы блогер қызды тікелей эфирде атып өлтірді

Мексикада 23 жастағы Валерия Маркес есімді блогерді сұлулық салонында атып кетті, деп хабарлайды Todayinfo. CNN арнасының хабарлауынша, қайғылы оқиға Мексиканың Сапопан қаласында болған. Бьюти-блогер Валерия Маркес өзінің TikTok парақшасында тікелей эфир жүргізіп отырған кезде сұлулық салонына белгісіз біреу кіріп келген.

«Валерия жазылушыларына сәлем жолдап отырған. Сол кезде бейтаныс адам кішігірім сәлемдеме алып келгендей болып есік қағыпты», – делінген шетелдік басылым мәліметінде.

Сәлемдемені алған соң, ер адам блогерге бірнеше мәрте оқ атқан. Эфир қылмыскер блогердің телефонын қолына алған кезде бір-ақ үзілген. Кадрдан оның жүзі анық көрініп үлгерген. Халиско штатының прокуратурасы бұл оқиғаны гендерлік зорлық-зомбылық негізінде жасалған деп отыр. Қазір тергеу амалдары жүріп жатыр, күдіктінің кім екені анықталуда.