«Күмәнсіз, табандылықтың арқасы»: Президент Қызылорда облысының әкімі Нұрлыбек Нәлібаевтың жұмысына жоғары баға берді

Фото: Ақорда Мемлекет басшысы Қасым-Жомарт Тоқаев Ұлттық құрылтай отырысында сөйлеген сөзінде Қызылорда облысының әкімі Нұрлыбек Нәлібаевтың еңбегін жоғары бағалады, деп хабарлайды Todayinfo.kz ақпарат агенттігі.

"Қазір Қызылорда облысында, әсіресе, әлеуметтік салада жақсы жаңалық көп. Үш жылда осы аймақта 34 білім беру, 45 мәдениет және спорт нысаны салынды. Бұған қоса, 40 медицина нысаны ашылды. Менің тапсырмаммен Қызылордада 300 орынға арналған көп бейінді аурухананың құрылысы басталды. Көп ұзамай 500 орындық емхана және 200 орындық перзентхана салынады. Бір сөзбен айтқанда, Қызылорда облысы барлық салада қарқынды дамып жатыр. Облыстың жағдайы жалпы жақсы деп күмәнсіз айтуға болады. Бұл – әкім Нұрлыбек Нәлібаевтың белсенді, табанды жұмысының нәтижесі", - деді Тоқаев.

Айта кетейік, Қызылордада Мемлекет басшысы Қасым-Жомарт Тоқаевтың төрағалығымен Ұлттық құрылтайдың V отырысы өтіп жатыр.