Отбасын жертөлеге қамап, тонап кеткен: Ақмола облысында депутаттың үйіне қарақшылық шабуыл жасалды

Әлеуметтік желілерде Ақмола облысының Астраханка ауылында аудандық мәслихат төрағасы Мейрам Қожахметтің үйіне қарақшылық шабуыл жасалғаны туралы ақпарат тарады,деп хабарлайды Todayinfo ақпараттық агенттігі. Алдын ала деректерге сәйкес, бетперде киген екі адам түнгі уақытта үйге кіріп, отбасын жертөлеге қамап, үйді тонап кеткен. Қарақшылар үй ішін тінтіп, ақша, алтын бұйымдар және автокөлікті алып кеткен. Кейін ұрланған көлікпен белгісіз бағытқа бет алған. Қазіргі уақытта қылмыскерлер іздеуде, олар әзірге ұсталған жоқ. Ақмола облыстық полиция департаменті бұл дерек бойынша Қылмыстық кодекстің «қарақшылық» бабымен іс қозғалғанын растады. Қазір жедел-іздестіру шаралары жүргізілуде.

«Күдіктілердің жеке басын анықтау және ұстау жұмыстары департамент басшылығының бақылауында», – делінген полиция хабарламасында.