Путин Әлиевке AZAL ұшақ апатына кінәсін мойындады

Путин Әлиевке Ресейдің зымырандары AZAL ұшағын тікелей атпағанын, оның жанында жарылғанын айтты. Ресей мен Әзербайжан президенттері Тәжікстанда кездесті. "Интерфакстың" хабарлауынша, кездесу басында Владимир Путин Ильхам Әлиевке Ақтаудағы "Әзербайжан әуе желілері" (AZAL) ұшағының апатын талқылауды ұсынды. Путиннің айтуынша, ұшақтың апатқа ұшырауына себептердің бірі — әуе кеңістігінде украиналық дронның болуы. РФ президенті екі зымыранды Ресейдің әуе шабуылына қарсы қорғаныс жүйесі ұшырғанын, бірақ олардың AZAL ұшағына тура тимей, бірнеше метр жерде жарылғанын айтты. Путиннің сөзінше, ұшаққа тікелей соққы емес, зымыранның ұсақ сынықтары тиген болуы мүмкін. Сондай-ақ Путин AZAL экипажына Махачқалада қону ұсынылғанын, алайда олар өздерінің базалық әуежайына қайтуды шешкенін айтты. Ресей президенті Әлиевке ұшақ апатының себептері туралы екі күн бұрын, 7 қазанда білгенін жеткізді. Айта кетейік, AZAL әуе компаниясына тиесілі Embraer E190 ұшағы 2024 жылдың 25 желтоқсанында Бакуден Грозныйға ұшып бара жатып, Қазақстанның Ақтау қаласында апатқа ұшырады. Ұшақ Украина дрондары Кавказ аймақтарына шабуыл жасаған сәтте құлаған. Апат салдарынан 38 адам қаза тауып, 29 адам аман қалды. Әзербайжан үкіметі ішінде бейресми түрде ұшақты Ресейдің әуе қорғаныс зымыраны атып түсіргені айтылған. "Әзербайжан әуе желілері" ұшағының апаты және Ресейдің кінәсін мойындаудан бас тартуы Мәскеу мен Баку арасындағы дипломатиялық дағдарысқа әкелді.