Санжар Тайжанның туындысы Лондонда «2025 жылдың стартапы» атанды

Қазақстандық кәсіпкер Sanzhar Taizhan негізін қалаған батарея стартапы Лондонда өткен халықаралық MOVE конференциясында «2025 ЖЫЛДЫҢ СТАРТАПЫ» аталымын жеңіп алды. Бұл - әлемдегі ең ірі көлік және автоөнеркәсіпке арналған стартаптар байқауы, деп хабарлайды Todayinfo.

«Біздің стартап 200 жобаның ішінен үздік деп танылды. Конференцияға 5 000-нан астам адам қатысты. Олардың қатарында Mercedes-Benz, BMW, Hyundai компанияларының жетекшілері болды. LG компаниясының бас директорымен бірге жеңісті атап өткен түскі ас — өз алдына ерекше әсер», – деп жазды Sanzhar Taizhan өзінің әлеуметтік желідегі парақшасында.

MOVE – көлік, технология және тұрақты даму саласындағы әлемдік көшбасшыларды біріктіретін беделді платформа. Конференция жыл сайын Лондонда өткізіліп, жаңашыл шешімдер мен экологиялық тиімді жобаларға басымдық береді. Sanzhar Taizhan-ның жобасы — энергия сақтау мен аккумулятор технологиясына бағытталған инновациялық стартап. Оның бұл жетістігі қазақстандық жас кәсіпкерлер мен инноваторларға жол ашатын маңызды қадам ретінде бағалануда.