Солтүстік Қазақстан облысы Булаева қаласында 4 адам дөнер жеймін деп уланып қалды, деп хабарлайды Todayinfo Tengrinews-ке сілтеме жасап.
Оқиға Мағжан Жұмабаев ауданындағы ауылдық стадионда өткен “Жастар-2025” облыстық спартакиадасы кезінде болған.
Облыстық санитариялық-эпидемиологиялық бақылау департаментінің мәліметінше, зардап шеккендердің үшеуі — бала, бірі — ересек адам. Алдын ала деректер бойынша, олардың барлығы 8 тамыз күні стадион аумағындағы сауда нүктесінен донер сатып алған.
“Мағжан Жұмабаев ауданында төрт адамнан тамақтан улану фактісі тіркелді. Қазіргі уақытта аудандық санитариялық-эпидемиологиялық бақылау басқармасы эпидемиологиялық зерттеу жүргізіп жатыр. Қажетті сынамалар алынды”, — деп хабарлады ведомствоның баспасөз қызметі.
Облыстық денсаулық сақтау басқармасының ақпаратына сүйенсек, зардап шеккендердің барлығы Петропавл қаласындағы жұқпалы аурулар ауруханасына жатқызылған.
Фото: freepik“Науқастардың жағдайы тұрақты, орташа ауырлықта, оң динамика байқалады”, — делінген басқарма хабарламасында.
