Трамп Украинадағы соғысты 100 күн ішінде тоқтатуды тапсырды

АҚШ президенті Дональд Трамп Украина бойынша өзінің арнайы өкілі Кит Келлогқа 100 күн ішінде Украинадағы соғысты тоқтату міндетін жүктеді, деп хабарлайды Todayinfo ақпарат агенттігі. The Wall Street Journal газетінің хабарлауынша, Ақ үйдің жаңа басшысы Украина бойынша келіссөздер процесін өзі басқарады. Келлогтың бұрынғы әріптестерінің пікірінше, оның жеке пікірі жоқ, ол Трамптың көзқарасына толықтай тәуелді. Сондықтан, Келлог «нақты келіссөздерге қатыспайды» деген пікір айтылған. 7 қаңтарда Трамп Украинадағы жағдайды 24 сағат ішінде реттеу мүмкіндігін жоққа шығармай, дағдарыс шешімі тым күрделі болуы мүмкін екендігін мойындаған. Ал Келлог 100 күндік мерзімде жағдайды реттеуге үміттенетінін білдірген. 21 қаңтарда Трамп АҚШ-тың Украинаға қару-жарақ жеткізіп беруін толығымен тоқтатуды да жоққа шығармады. Сонымен бірге, ол Ресей президенті Владимир Путинмен «қалаған уақытында» кездесуге дайын екенін айтты. Алайда, егер Ресей Украина мәселесіне қатысты келісімге келмесе, санкцияларды күшейту мүмкіндігін де алға тартты.