Түркияда халықаралық іздеудегі Талғат Ардан ұсталды

2019 жылдан бері халықаралық іздеуде жүрген «Астана LRT» компаниясының бұрынғы басшысы Талғат Ардан Түркияда қолға түсті. Бұл туралы Ұлттық қауіпсіздік комитетінің баспасөз қызметі хабарлады,деп хабарлайды Todayinfo ақпараттық агенттігі. ҰҚК мәліметінше, Қазақстан Бас прокуратурасы 2019 жылдың қыркүйегінде Түркияның Әділет министрлігіне Арданды экстрадициялау туралы ресми сұрау жолдаған. Содан бері түрік тарапынан іздестіру шаралары жүргізіліп келген. 2025 жылғы 9 мамырда Түркияның құқық қорғау органдары Арданды Анталья қаласында ұстады. Сот сол күні оны Қазақстанға депортациялау туралы шешім қабылдады. Қазіргі уақытта Талғат Ардан қамауға алынған.

«Түркия Республикасының құзырлы органдары жүргізген іздестіру нәтижесінде оның нақты орналасқан жері анықталды. Қазақстанның құзырлы органдары экстрадициялау рәсімдерін бастаған», – деп хабарлады ҰҚК баспасөз қызметі.

Астана қаласының соты Талғат Арданды ҚР Қылмыстық кодексінің 189-бабының 4-бөлігі («Сеніп тапсырылған бөтен мүлікті аса ірі көлемде иемдену») және 361-бабының 4-бөлігі («Лауазымдық өкілеттіктерді асыра пайдалану») бойынша кінәлі деп таныған. Ол сырттай 9 жылға бас бостандығынан айырылған болатын. Қазақстан тарапы Арданды елге қайтару мақсатында тиісті құқықтық рәсімдерді қолға алды. Бұл істі Бас прокуратура мен Сыртқы істер министрлігі бірлесіп үйлестіріп отыр.