Соңғы күндері қазақстандықтардың WhatsApp желісінде үрейлі хабарлама желдей есіп жүр. Аудио және мәтін түріндегі таратылымда: "Егер жол ортасында жатқан баланың орындығын (автокресло) немесе жалғыз баланы көрсеңіздер, тоқтамаңыздар! Бұл – тұзақ!" делінген.
Бұдан бөлек, көліктің алдыңғы терезесіне жұмыртқа лақтырып тоқтату әдісі туралы да ақпарат тарауда. Ішкі істер министрлігі (ІІМ) осы жағдайға байланысты ресми мәлімдеме жасады.
Бұл шындық па?
Полиция департаментінің хабарлауынша, бұл ақпарат – фейк (жалған).
Қазақстанда қарақшылардың дәл осылай (бала орындығын қойып немесе жұмыртқа лақтырып) көлік тоқтатқан деректері тіркелмеген. Бұл – жылдар бойы интернетте жүретін ескі "қала аңыздарының" бірі ғана. Алайда, оның қайта таралуы халық арасында негізсіз дүрбелең туғызып отыр.
Фейк хабарламада не айтылады?
Тарап жатқан ақпарат бойынша:
-
Қылмыскерлер түнде жолға ішінде "бала" бар секілді көрінетін автокресло қояды.
-
Жүргізуші көмектесуге түскенде, оны тонап кетеді.
-
Немесе терезеге жұмыртқа лақтырады: оны сүрткішпен (дворник) тазалағанда әйнек лайланып, жүргізуші тоқтауға мәжбүр болады-мыс.
Маңызды ескерту: Таратпаңыз!
ІІМ өкілдері тек ақпаратты жоққа шығарып қана қоймай, қатаң ескерту жасады. Есіңізде болсын: жалған ақпарат тарату – қылмыс.
"Қазақстан Республикасының заңнамасына сәйкес, көрінеу жалған ақпаратты бұқаралық ақпарат құралдары немесе әлеуметтік желілер арқылы тарату қылмыстық жауапкершілікке әкеп соғады", – деді ведомство өкілдері.
Яғни, "жәй ғана туыстарыма ескертейінші" деп чатқа жіберген хабарламаңыз үшін заң алдында жауап беруіңіз мүмкін.
Егер сізге осындай хабарлама келсе:
-
Оны ешкімге таратпаңыз.
-
Жіберген адамға мұның жалған екенін ескертіңіз.
-
Тек ресми дереккөздерге (Polisia.kz, ресми жаңалықтар сайттарына) сеніңіз.
Бұған дейін де алаяқтардың "1414-тен келген SMS" және "Халық санағы" туралы жалған ақпарат таратқаны белгілі болған еді. Сақ болыңыз!
