Жамбыл облысында 6 баллдық жер сілкінісі болды

Қазақстан Республикасы Төтенше жағдайлар министрлігінің (ҚР ТЖМ) «Сейсмологиялық зерттеу институты» ЖШС сейсмикалық станциялар желісінің мәліметінше, 2025 жылғы 8 шілдеде, сағат 14:30-да (Астана уақыты бойынша) Қазақстан аумағында жер сілкінісі орын алды,деп хабарлайды Todayinfo. Жер сілкінісінің ошағы Алматы қаласынан оңтүстік-батысқа қарай 334 шақырым жерде орналасқан. Жер сілкінісі келесі елді мекендерде сезілді:

• Құлан а. – 6 балл
• Мерке а. – 5 балл
• Шу қ. – 3 балл
• Сарыкемер а., Төле би а., Тараз қ. – 3 балл

Аса а., Мойынқұм а., Қордай а., Бауыржан Момышұлы а., Қаратау қ., Тұрар Рысқұлов а. – 2 балл Қазіргі уақытқа дейін қираулар мен зардап шеккендер туралы ақпарат тіркелмеген. ҚР ТЖМ мәліметінше, барлық күштер мен құралдар шұғыл әрекет етуге толық дайын. Төтенше жағдайлар вице-министрі Батырбек Әбдішевтің төрағалығымен ТЖМ командалық орталығының жедел штабы бейнеконференция байланысы арқылы өңірмен тұрақты түрде ақпарат алмасып отыр. Қазіргі уақытта ТЖМ мониторинг жүргізуді жалғастыруда және өңірдегі жағдайды тұрақты бақылауда ұстап отыр.