Астанада полиция қызметкерлері жүкті әйелді перзентханаға жедел жеткізді

Патрульдік полиция батальонының қызметкерлері Алиасқар Әшім мен Есет Бүзекеев Арқар көпірінде жылдамдықты асырған көлікті тоқтатты, деп хабарлайды Todayinfo.kz. Белгілі болғандай, көліктің тізгінінде отырған ер адам жүкті әйелін перзентханаға жеткізуге асыққан. Жағдайдың маңыздылығын бірден түсінген полиция қызметкерлері әйелді өздерінің қызметтік көлігіне отырғызып, оны санаулы минут ішінде ауруханаға жеткізді. Ауруханаға жеткеннен кейін 10 минуттан соң дүниеге ұл бала келді. Отбасы өздерінің қызметтік міндетін ғана емес, ең маңызды сәтте адамгершілік пен жанашырлық танытқан полиция қызметкерлеріне шын жүректен алғыс білдірді.

Мұнда әрбір минут маңызды екенін түсіндік. Мұндай сәтте жай бақылаушы болып қалу мүмкін емес. Біз кез келген форма киген адамның жасайтын ісін жасадық, – деп бөлісті полиция қызметкерлерінің бірі.