«Азық—түліктің қымбаттығын жазған»: Түркіменстанда билікті сынаған блогерді өлтіріп кеткен

Журналистер Түрікменстанда азық-түлік бағасының қымбаттауын ашық сынағаннан кейін жоғалып кеткен блогер Дидар Амансахатовтың жерленген орнын анықтады, деп хабарлайды Todayinfo.kz ақпарат агенттігі. Азаттық радиосының Түрікменстандағы тілшілері тапқан бұл дерек блогердің қаза тапқаны жөніндегі ақпараттың шындыққа жанасатынын көрсетті. Дидар Амансахатов TikTok әлеуметтік желісінде елдегі экономикалық жағдайды, әсіресе азық-түлік бағасының шарықтауын жиі сынға алып жүрген. Алайда оның қаза болуына қатысты нақты мән-жай әзірге ресми түрде жарияланған жоқ. Марқұм небәрі 34 жаста болған. Hitrowski деген лақап атпен танылған блогер қараша айының соңында әлеуметтік желілерден кенеттен жоғалып кеткен. Бұл кезеңде Түрікменстан билігі әлеуметтік желіде сын пікір білдірген азаматтарға қысымды күшейткені хабарланған. 18 желтоқсанда Азаттық радиосы редакциясы Амансахатовтың қауіпсіздік құрылымдары тарапынан ұсталып, азаптау салдарынан қаза тапқаны туралы мәлімет алғанын хабарлаған еді. Алайда бұл ақпаратты ел билігі ресми түрде растаған да, жоққа шығарған да жоқ. Бұл оқиға – Түрікменстандағы сөз бостандығының нақты жағдайын айқын көрсететін ауыр мысал. Экономикалық қиындықты айту – қылмыс емес, ал оны айтқандардың жоғалып кетуі немесе үнсіз жерленуі – мемлекеттің әлсіздігін білдіреді. Блогерлер мен қарапайым азаматтардың әлеуметтік желідегі пікірі билік үшін қауіпке айналса, мәселе пікір иесінде емес, жүйенің өзінде. Ақпаратты тұншықтыру арқылы шындықты жою мүмкін емес, бірақ қоғамды қорқынышта ұстауға болады. Алайда мұндай саясат ұзаққа бармайды. Дидар Амансахатовтың тағдыры – тек бір адамның қасіреті емес, ол сөз еркіндігі жоқ елдегі мыңдаған үнсіз дауыстың символына айналды.