Мал Қырғызстанға заңсыз шығарылып жатыр: депутат дабыл қақты

Мәжіліс депутаты Гүлдара Нұрымова Ауыл шаруашылығы министрі Айдарбек Сапаровқа және Ішкі істер министрі Ержан Саденовке мал басын сақтап қалу және оның тұрақты өсімін қамтамасыз ету жөнінде депутаттық сауал жолдады, деп хабарлайды Todayinfo ақпарат агенттігі.

«Қазіргі таңда Қазақстандағы мал шетелге, әсіресе Қырғызстанға заңсыз шығарылуда. Өйткені ол жақта ет бағасы жоғары. Сонымен қатар, бүгінде елімізде де ет бағасының өсуі байқалуда. Заңда белгіленген шектеулерге қарамастан, тірі малдың заңсыз шығарылу фактілері аз емес», – деді депутат.

Оның айтуынша, ішкі нарықтағы ет бағасын тұрақтандыру бойынша реттеу шараларын қабылдау қажет. Сонымен қатар, мал басын сақтап қалу және оның өсімін қамтамасыз ететін ынталандыру тетіктерін қарастыру маңызды.