«Орыстілді ел деп ойлағаны қынжылтты»: Әлем чемпионатында қазақстандық боксшыларға сұрақтарды орысша дайындаған

Фото: ҰОК Спорт журналисі Аслан Каженов Ливерпульде (Англия) өткен әлем чемпионатында жергілікті БАҚ өкілдерінің қазақстандық боксшыларға сұрақты орыс тілінде дайындап қойғанын айтты, деп хабарлайды Todayinfo.kz ақпарат агенттігі. Бұл туралы ол “Бірінші бол” You Tube арнасына берген сұхбатында айтты. Аслан Қаженовтың сөзіне сенсек, жергілікті журналистер мен жарысты ұйымдастырушылар Қазақстанды “орыстілді ел” деп қабылдаған.

”Жергілікті журналистерге біздің боксшылар сұхбат берді. Ұйымдастырушы тарап сұхбат алатын кезде Қазақстаннан келді деген соң аудармашымен ағылшыннан орысшаға аударып қойған. Біз өзіміздің қыз-жігіттерден орысша жауап бересің ба деп сұрасақ, жоқ дейді. Бірінші Төрехан білмей қалды. Тіпті сұрақты да түсінбей қалып жатты. Қазақ қыз-жігіттері әлем чемпионы атанды. Олар сұхбатты қазақ тілінде берді. Ешкім оны басқа тілде сөйле деп мәжбүрлей алмайды. Бүкіл әлем қазақ тілінде тыңдап соны аударып алды. Біздің елде де орыстілді журналистер амал жоқ аударып жатыр. Бұған дейін сол әріптестеріміз көп менсінбей, сын айтып, аяқтан шалып қалуға тырысатын. Мына жерде жетеуі де чемпион болғасын материал жасап жатыр. Боксшылар рингте тек елдің мүддесі үшін емес, мемлекеттік тіл үшін де күресіп жүр. Оны да ерекше айту керек”, — дейді ол.

Еске салсақ, Англияның Ливерпуль қаласында өткен бокстан әлем чемпионатында Қазақстан құрамасы 7 алтын медаль алып, командалық есепте бірінші орын алды.