Қарашөкеевтің қамқорлығы: Облыс әкімі Меркіде уланып қалған балалардың жағдайын білу үшін түнделетіп ауруханаға келген (ВИДЕО)

Фото: скриншот Жамбыл облысы Меркі ауданындағы жекеменшік балабақшада уланған 14 бала ауруханада жатыр.   Облыс әкімі Ербол Қарашөкеев осы балалардың қалай емделіп жатқанын білу үшін түн ішінде ауруханаға келген, деп хабарлайды Todayinfo. Әкімнің баспасөз қызметі ауруханадан видео таратып, онда Қарашөкеевтің ауданға қараңғыда келгенін көруге болады. Алдымен балалар жатқан палаталарды аралап, олардың ата-аналарымен сөйлескен. Кейін аурухана ішінде жиын өткізген. Уланған балалардың ең кішісі үш айлық сәби. Бірақ, ол үйде ауру жұқтырған.

«Қазір 14 бала мен 1 ересек адам ауруханада, 9 бала үй жағдайында ем қабылдап жатыр. Ауруханадағы балалардың 10-ы балабақшаға баратын балалар, ал, біреуі үш айлық бүлдіршін, 3 бала мектеп оқушылары. Тағы бір бала жан-жақты тексеру үшін облыс орталығында жатыр», - деп жазды Қарашөкеев.

Әкім ауруханада жауапты басшыларға нақты тапсырма берген. Соның ішінде дәрігерлерге осы балбақшаға баратын қалған балалардың үйіне барып, тексеруді тапсырған. Ал, санитариялық-эпидемиологиялық бақылау департаментіне балалар неден уланғанын анықтау үшін тиісті сараптама жүргізуді міндеттелді.